Ғәфү итегеҙ!

Ошо ваҡытта уны ситтән берәй танышы күреп ҡалһа, бының мейеһе сәпсим шыла башлаған, ахырыһы, тип уйлаясағы көн кеүек асыҡ. Бының үҙ сә­­бәбе лә бар шул: биш йыл буйы һиң­майға әйләнә яҙып уҡығандың емешен күрер көн етте –ҡулына инженер дипломы алды. Икенсенәнме, кеҫәһендә “Заводҡа бөгөндән инженерҙар талап ителә” тип иғлан яҙылған кескәй генә гәзит киҫәге ята. Бынау заманда эш табыуҙары, ай-һай. Хат­­та иҙән йыуғысын да урамдан килеп ингән йыйын әтрәғәләмгә тәтетеп бармайҙар...
Кадрҙар бүлегендә өҫтәл артында йыуантаҡ кәүҙәле, таушалып бөткән кәстүм кейгән, аҡшайып торған ҡыҙыл галстук таҡ­ҡан, шул муйынсаҡ төйөнө кеүек суҡмар танаулы, өлкәнерәк йәштәрҙәге ир-уҙаман йоҡомһорап ултыра ине. Ул Мәсғүткә, аҙашып килеп сыҡтыңмы әллә, тигәндәй, бер килке аптырап ҡарап торҙо. Унан ни хәстәр менән йөрөүен ишеткәс, һары, эре тешле ауы­ҙын ҙур итеп асып иҫнәп алды ла:
– Быйыл ғына университет тамамланым, тиһең инде, ә? –тип ҡабатлап һораны.
–Эйе!
– Ғәфү итегеҙ, дипломығыҙҙы күрһәтегеҙ әле.
Мәсғүт портфеленән ҙур кинә­нес менән юғары белем алыуы ту­раһындағы дүкәминтен сығарып һондо.
–Бына!
Теге йыуантаҡ дипломды тегеләй әйләндерҙе, былай әйләндерҙе лә:
– Ҡыҙыл дипломға бөттөм ти­һең инде. Бик шәп, бик хуп, – ти­не. Унан һорауҙарын теҙә башланы.
– Ғәфү итегеҙ, ниндәй һөнәр­ҙә­регеҙ бар?
Мәсғүт баҙап ҡалды ла күҙен таҫырайтты:
–Нисек инде, ниндәй һөнәр, ин­женер инде.
–Уныһын беләм дә, йәғни, мәҫәлән, йырлай беләһеңме тип һорауым.
– Юҡ, юҡ, ғүмере йырлағаным юҡ.
Унан ир бармаҡтарын шартлата-шартлата:
– Бәлки, бейеүгә оҫтаһыңдыр? – тине.
– Ю-ю-ҡ!
– Улайһа, матур итеп һүрәт төшөрәһеңдер?
– Хоҙай уныһынан дә мәхрүм иткән.
– Может, фокус-мокус күрһәтә беләһеңдер?
–Юҡ.
– Берәй төрлө спорт буйынса, бәлки, разрядығыҙ барҙыр?
Һорауҙарына гелән генә “юҡ” тигәнде ишеткән начальник, ауыҙын салышайтып, мыҫҡыллы йылмайҙы.
–Юҡ, юҡ, – тине ул битен сирыштырып, – бына нәмә, ҡус­тым, – ғәфү ит, һине бер нисек тә беҙҙең коллективҡа бара тор­ған кеше итеп күрмәйем. Беҙгә төрлө яҡлап талантлы, заводтың шөһрәтен яҡларҙай кешеләр кәрәк. Ә бының өсөн бер диплом ғына аҙ, аҙ ғына түгел, ә пүстәк. Ана, ай һайын тигәндәй төрлө йыр, бейеү конкурстары, төрлө спорт ярыштары тыпылдап үткәрелеп тора. Шунда барып, еңеп ҡайтырҙай хеҙмәткәрҙәр кәрәк. Ә һеҙ... Ғәфү итегеҙ.

Венер ИСХАҠОВ.