"Хәйерле иртә!"

05.30
Төндө ҡайҙалыр үткәреп, һәм, күрәһең, бик арып, кәйефһеҙ ҡайтып килгән ике ата бесәй тап подъезд алдында осрашып һуғышты ла китте бит. Уйнап ҡына йәки исем өсөн генә лә түгел, ә ысынлап, йән-тәс­мән. Ә тауыштары! Арыҫлан менән юл­барыҫ алышамы ни? Таз да тоз, мау ҙа мау киләләр генә. Был дау нимә менән тамамланыр ине икән, икенсе ҡаттың балкон тәҙрәһе асылып китеп, кемдеңдер иҫке тәпешкәһе осоп килеп сыҡмаһа. Хатта ки, осоп барып теге ике януарҙың ҡай ерҙәренәлер теймәһә. Ә ул осоп барған саҡта тағы икеме-өсмө тәҙрәнән аҡыр­ҙылар ҙа:
– Перес-с-с!
– Ҡәҫәр ҫуҡҡырҙары!

06.00
Мине өҫкө ҡаттағы ҡыҙыҡай уята. Бына ул карауатынан шыуып төшә лә суйын тояҡтарын кейеп алып, өй буйлап йүгерә һәм, моғайын, берәй ботлоҡ шарҙарҙы тә­гәрәтә башлай. Ул шулай кискә тиклем са­бып йөрөй ала. Түҙемһеҙлек менән был сабыйға өс йәш тулғанын һәм уны балалар баҡсаһына йөрөтә башлған­дарын көтәм.
Аҫҡы ҡаттағы һаңғырау ҡарсыҡ уяна ла, радиоһын ҡабыҙа. Уныһының тауышы, әл­биттә, бөтә көсөнә асылған. Һуң, әбекәй ишетмәй бит! Ә беҙ бына ишетәбеҙ һәм теләйбеҙме-теләмәйбеҙме тыңлай­быҙ.

06.30
Ванна бүлмәһендә ике яҡ стена вибрацияла. Сөнки фендар, кер йыуыу машиналары, душтар бер юлы геүләй, зырлай һәм шөптөрләй. Һин дә шуларға ҡушылып китәһең.
Ун һигеҙ ҡатта ла пышылдатып, сыжылдатып, бығырлатып нимәләрҙер ҡайната, бешерә, көйҙөрә башлайҙар.

07.00
Теге перфораторлы әҙәм уяна ла, күҙ­ҙә­рен дә асмаған килештер, моғайын, ин­де йоҡартып бөткән, моғайын, стена­һына тотона. Уны йөҙәрләгән фатирҙар­ҙан күп ҡатлы йорттарҙа ғына була торған бик боронғо яман әр менән һүгәләр.
Ҡапыл ғына бөтәһенең дә телефондары таныш булмаған шылтыратыу­ҙарҙан зың­лай башлап, хатта тотош өйҙә бер геү барлыҡҡа килә. Был банктар эш башлай ҙа, беҙҙе тиҙерәк яҡшы хәбәрҙәр менән ҡыуандырырға теләй.
Хәйерле иртә менән!

Сәйҙә ҒАРИПОВА.

Фото: pictures.pibig.info