+13 °С
Болотло
Бөтә яңылыҡтар
Шулай ҙа була!
27 Март , 17:00

ЕҢДЕК!

Баш ҡалала бик мөһим ҡарар ҡабул ителде. Коррупцияға ҡаршы көрәште көсәйтеп ебәрергә булғандар икән. Элек тә көрәшмәнеләр түгел, көрәштеләр, әл­бит­тә. Әммә был ҡәһәр һуҡҡан нәмә­кәй дейеү кеүек булып сыҡты, бер ба­шын киҫеп ташлаһаң, урынына ике баш үҫеп сыға. Исеме лә ниндәй бит әле, беҙҙең илдә йөҙҙән ашыу тел бар, береһендә лә шул һүҙ юҡ, һүҙе бул­мағас, үҙе лә юҡ бит инде, был ситтән килгән бәләгә көрәш юлдары билдәһеҙ. Илдә бер нисә коррупция институты асыл­ды ла бит, уларҙың емеше ҡасан өлгөрә әле ул, ә беҙгә бөгөнгөһө ҡиммәт. Ә яңы афәт беҙҙе тамам бөрөп алып бара.

ЕҢДЕК!
ЕҢДЕК!

...Был юлы ысынлап тотондолар, шикелле. Тәүҙә социаль селтәрҙәрҙә имеш-мимеш кенә йөрөһә, уның артынан илдең бөтә төбәктәренә иң ҙур кеше ҡул ҡуйған ҡағыҙ килеп етте. Ул бер биттән генә торһа ла, өҫтән аҫҡа төшкән һайын ҡалыная барып, беҙҙең ойошмаға килеп еткәнсе көс еткеһеҙ папкаға әүерелгәйне. Һәр бер етәксенең үҙен эшлекле һәм кәрәкле икәнен күрһәтергә тырышыуы һөҙөмтәһе инде, беҙҙә зирәк кеше менән донъя тулған бит ул.
Директор ашығыс кәңәшмә йыйҙы.
– Хәл бик киҫкен, – тип башланы ул һүҙен. – Элеккесә ябай отписка менән ҡотолоп булмаҫ. Ун коррупционер табырға, уларға ниндәй яза бирелеүе тураһында хәбәр итергә кәрәк. – Ул ауыр папка өҫтөнә усы менән бер нисә тапҡыр һуғып алды ла, асып ебәрҙе. – Бына бында вис яҙылған.
– Уны нишләп эҙләп торорға, беҙ бында теп-теүәл ун кеше, – кадрҙар бүлеге мөди­ре­нең шаяртып һөйләшеүенә өйрәнеп бөт­кәндәр, барыһы ла дәррәү көлөп ебәрҙеләр.
Директорҙың ғына төҫө үҙгәреп китте.
– Һеҙ бында туғыҙ, унынсыһы мин буламдыр инде, шулай бит? Һеҙ миңә бер ниндәй дәлилһеҙ ауыр ғәйеп ташланығыҙ, мин һеҙҙе судҡа бирәм. Минең һигеҙ ша­һитым бар. – Ул ҡарашын залға йүнәлтте. Әле генә көлөшөп ултырыусылар тын ҡалып, баштарын аҫҡа эйгәйне.
Кадровик, ултырғысына кнопкалар һибелгәндәй, тыпырсына башланы.
– Мин шаяртып ҡына әйттем бит, ғәфү итегеҙ, – тине ул, тотлоға-тотлоға. – Бүтән мәңге шаяртмайым, валлаһи, ант итәм.
– Һеҙ барып эләгәсәк ерҙә шаяртыусылар бик һирәктер ул, – директор үҙенекен ҡуйманы. – Яла яғыусыға ун йыл төрмә, ә унда ҡораллы кешеләр генә шаярта.
Кадровик ап-аҡ булды. Яҡлаусы эҙләп тирә-яғына күҙ һалды, барыһы ла үҙҙәре­нең ботинкаларын күҙәтеү менән мәшғүл ине.
– Тынысланығыҙ, мин дә шаярттым, – директор ихлас йылмайҙы. Үҙенең коррупционер түгел икәнлегенә барыһын да ышандырҙы, шикелле. Юҡһа бит, балыҡ башынан серей, тиерҙәр ҙә... Артабан нимә булырын уйлауы ла ҡурҡыныс.
Залдағыларға ла йән керҙе. Бары­һының да аяҡ кейеме үҙ урынында икәнлеге асыҡланды, артабан күҙәтеүҙең кәрәге юҡ. Кадровикка валерианка һалып бирҙеләр. Директор ҙа киң күңелле кеше икән, һис тә үс тотмай, артабан да шаяртырға рөхсәт итеү генә түгел, барыһы исеменән үҙе һораны. Кабинет тамам элекке хәленә ҡайтты, тиерлек. Тик тынысланырға иртәрәк булып сыҡты.
– Әйткәндәй, – тине директор, папка эсенән тағы бер ҡағыҙ килтереп сығарып. – Бында яҙылған, һәр ойошмала ун процент коррупционер була, тигән. Тимәк, беҙҙең арала әле бер ришүәтсе ултыра. Уны хәҙер үк фашларға кәрәк.
Ул тағы кадровикка күҙ һалды.
– Йә, бурҙың бүрке янамы?
Валерианка күберәк булған, ахрыһы, кадровиктың төҫө бер ҙә үҙгәрмәне.
– Улай тип әйтеү дөрөҫ булмаҫ, тип уйлайым, – тине ул тыныс ҡына. – Беҙ бит бында төрлө ерҙән йыйылған. Әйҙә, бы­лайтайыҡ. Беҙҙең ойошмала ун бүлек бар. Папканың күсермәләрен эшләп, бүлектәргә таратып сығайыҡ. Өс көн эсендә берәр коррупционер табып бирһендәр. Бүлектәр ҙур, бер кеше табыуы ҡыйын булмаҫ.
– Әлдә үҙеңде ултыртып өлгөрмәнек, – тип тағы шаяртты директор. – Ҡотҡарҙың бит беҙҙе.
Барыһы ла, өҫтәренән тау төшкәндәй, еңел һулап ҡуйҙы. Дөрөҫөн әйткәндә, һәр кем үҙенең дә, эргәһендә ултырыусы­ларҙың да нәҡ шул уғры икәнен бик яҡшы белә ине.
Шул көндә үк папкалар бүлектәр буйлап таралды. Унда­ғылар нишләгәндер, әйтеүе ҡыйын, әммә өс көндән яуаптар йыйылды. Ҡыҙыҡ, уларҙың барыһы ла бер төрлө булып сыҡты.
Юғарыға яуап шул көндә үк китте. Уның йөкмәткеһе...
Коллективта ун коррупционер табылды, улар эштән ҡы­уыл­ды, улар урынына сит илдән намыҫлы урам һе­переү­селәр һәм иҙән йыуыусылар алынды. Беҙ коррупцияны пландан өс көнгә алданыраҡ еңдек!

Вәкил ШӘРӘФЕТДИНОВ.

Фото: polinka.top

Автор:"ҺӘНӘК" журналы
Читайте нас: