Урамда буран, көрт кисеп барам

Был аһ-зар ҡайҙан ишетелә, тиһегеҙме? Республиканың бөтә ҡала һәм ауылдарынан. Сираттағы оператив кәңәшмәлә республика башлығының социаль коммуникациялар буйынса идаралығы начальнигы Дмитрий Черенковтың сығышынан шул билдәле булды: 2024 йылдың 29 декабренән 2025 йылдың 12 ғинуарына тиклем халыҡтан барлығы ун меңгә яҡын мөрәжәғәт ҡабул ителгән. Шуларҙың яртыһы самаһы – йорт эргәләрендәге һәм оло юлдарҙың таҙартылмауына зарланыусылар. Айырыуса Өфө, Стәрлетамаҡ ҡалалары һәм Бәләбәй районы халҡын ошо мәсьәлә борсой. Юлдарҙы ремонтлау, уларҙың төндә яҡтыртылмауы проблемалары ла күтәрелә.
Хатта торлаҡ-коммуналь хужалыҡ мәсьәләләренә арналған мөрәжәғәттәрҙең дә күбеһе йорт ҡыйыҡтарынан ҡарҙы ваҡытында таҙартмауға бәйле.
Халыҡты шулай уҡ һаулыҡ һаҡлау, социаль ярҙам, льготалы дарыуҙар алып булмауы, йәмәғәт транспортының тейешенсә эшләмәүе, сүп-сарҙың ваҡытында сығарылмауы ла борсой.
Йыл яңы башлана, ә күңел йәмле яҙҙы һағына. Шулай ҙа эреле-ваҡлы түрәләр уны айырыуса өҙөлөп көтәлер, сөнки юлдар ҡарҙан былай ҙа әрселеп бөтәсәк бит.

Өлгөр ТИКТОРМАҪОВ.