+30 °С
Болотло
Шулай ҙа була!
20 Август 2025, 08:30
КОМИССИЯ
Сәлих ВАҺАПОВ Илмир былтыр ҡулына юғары белем тураһында диплом алды. Ҡыҙыл диплом. Үҙенең тыуған ауылына уҡытырға ҡайтты. Ҡайтты ла ең һыҙғанып эшкә тотондо.Ҡартатаһы, Социалистик Хеҙмәт Геройы, беренсе көндән үк сифат өсөн тырыш, тип киҫәтеп ҡуйҙы.— Төн уртаһында уятып һораһаң да, уҡыусыларың шартлатып яуап бирерлек булһын, — тип өҫтәне.
КОМИССИЯ
Илмир иртәнән кискә тиклем мәктәптә булды. Төшкә тиклем дәрес уҡытһа, төштән һуң өҫтәлмә үткәрҙе. Эшләгәс, эштең һөҙөмтәһе күренде: уҡыусылары олимпиадала урындар ала башланы. Эштәр көйлө генә барғанда бәлә аяҡ аҫтында ятҡан булып сыҡты: комиссия килеп төштө.
— Тәк-тәк, Илмир Ғәлимович, документтарың етмәй бит әле. Непорядок, непорядок, — тине комиссия башлығы Рәис Илфатович. — Йәш кешегә эшеңә илке-һалҡы ҡарау, мин әйтәйем, эт ботонан ҡырын. Ҡайҙан килә был йәштәрҙә эшкә илке-һалҡы ҡарау? Ә бына беҙ... — тип тикшереүсе хыялға бирелде.
— Рәис Илфатович, минең уҡыусыларым төндә уятып һораһаң да, любой һорауға шартлатып яуап биреүҙәренә ышанам.
— Уныһы, әлбиттә, яҡшы, — тине Рәис Илфатович. — Ләкин мин быны күрмәйем. Ошоно дәлилләгән ҡағыҙҙарың етмәй. Йәш булыуыңды иҫәпкә алып, эшеңә тура килмәй тигән мәсьәләне ҡуймайбыҙ. Ҡара уны, икенсе юлы ла ошолай булһа...
— Рәис Илфатович, былай ҙа ҡараңғы төшкәнсе мәктәптәбеҙ. Ҡалайтып өлгөрөргә?
— Белмәйем, белмәйем, Илмир Ғәлимович. Инструкцияла уныһы яҙылмаған, бәлки, яҙырға онотҡандарҙыр...
