+14 °С
Облачно
Шулай ҙа була!
11 Июня , 05:05
Хоккей бәләһе
Күрше йортҡа йәш ғаилә күсенеп килде. Хужа кеше үтә лә хоккей яратыусы бер әҙәм булып сыҡты. Ҡулдарына сәкән тотмаһа ла, телевизорҙа барған бер матчты ла ҡалдырмайса ҡарап бара. Мин үҙем спорт фанаты түгелмен. Бар ғүмерем эш-йорт-эш маршрутында үтә. Бөтмәҫ командировкаларҙа йөрөп, өйгә һирәк кенә ҡайтҡылаған саҡтар булғылай.Көндәрҙең береһендә көтмәгәндә-нитмәгәндә беҙгә күршем килеп инде. Кәйефе бик күтәренке бының: ауыҙы ҡолаҡтарына еткән, күҙҙәр баҙлап яна.
Хоккей бәләһе
– Шатлығым менән уртаҡлашырға керҙем, күршекәйем! – ти был ҡуйынынан бер «ярты» сығарып.
– Бик мәслихәт! – тигән булдым, үҙенә һораулы ҡараш һирпеп, – Атҡа менгәндәй булғанһың!
– Һиии, ат имеш. «Салауат Юлаев» «Барыс»ты етегә дүрт менән еңде! Минең өсөн шунан да ҙур ниндәй шатлыҡ булыуы мөмкин?!
Сираттағы командировканан ҡайтып, ихатамда ваҡ-төйәк эш менән булашып йөрөйөм. Бер заман күршемдең урамында кинәт дауыл ҡуптымы ни! Иң башта бик яман итеп оятһыҙ һүгенгән тауыш ишетелде. Унан һауаға берәм-һәрәм аяҡ кейемдәре һәм төрлө һауыт-һаба осто. Ҡайһылыр мөйөштә әрнеп-әрнеп эт сәңкелдәне, ҡойма буйлап һыҙғырып бесәй сабып үтте. Артабан был мәхшәр һарайға күсте. Ҡура эсенән пыр туҙышып әтәс-тауыҡтар осоп сыҡты һәм кәртә емереп һыйырҙар тулашты.
Ул көндө беҙҙең команда «Аҡ Барс»тан 6:3 иҫәбе менән еңелгән ине.
Ишдәүләт ағайығыҙ.
