Һарыҡтарға бирәбеҙ

Азамат башын эйеп уйланып ултыра, яуап әҙерләй. Уҡытыу­сы уны яуап бирергә саҡырҙы.
– Һорауҙы уҡығыҙ.
– Һигеҙенсе билет. Беренсе һорау: “Шәкәр сөгөлдөрөнөң төп ҡулланышы”. – Азамат ты­нып ҡалды.
– Шәкәр сөгөлдөрө ни өсөн кәрәк? – тип һораны уҡытыу­сы “шәкәр” һүҙенә баҫым яһап.
– Ни... беҙ өйҙә һарыҡтарға бирәбеҙ.
– Тәк, яҡшы, – уҡытыусы уны хупланы. – Шәкәр сөгөл­дө­рө тағы ла ни өсөн кәрәк?
– Ни... беҙ тағы ла һыйыр­ҙарға бирәбеҙ.
– Был аңлашыла. Уны тағы ла ни өсөн үҫтерәләр?
– Беҙ уны тағы ла тауыҡ­тарға бирәбеҙ, ләкин улар уны насар суҡый, яратмайҙарҙыр, күрәһең...
– Һинеңсә, шәкәр сөгөлдөрө йорт хайуандарына ашатыла. Шу­лаймы?
– Ни... шулай.
– Ләкин уның төп ҡулла­нылышы был түгел бит, дөрөҫ­мө? Тәк, шәкәр сөгөлдөрөн ни өсөн үҫтерәләр?
– Ни... беҙ һарыҡтарға бирә­беҙ...
– Яҡшы, – уҡытыусы тауышын күтәрә төштө. – Тыңла. Һин йоҡонан торғас ни эшләй­һең?
– Зарядка эшләйем.
– Маладис. Ашайһыңмы?
– Әлбиттә.
– Сәй эсәһеңме?
– Эйе, эсәм.
– Нимә менән эсәһең?
– Бал менән, варенье менән...
– Тәк, – уҡытыусы уны бүл­дерҙе, – ә вареньены нимәнән яһайҙар?
– Беҙҙә ҡарағаттан, сейәнән яһайҙар, үҫһә, еләктән дә ҡай­наталар. Алманыҡы ла тәмле була.
– Тәк... Шулай ҙа шәкәр сө­гөлдөрөнөң төп ҡулланышы нимәлә?
– Ни... беҙ һарыҡтарға би­рәбеҙ.
Шунда уҡытыусыбыҙҙың түҙемлеге шартлап һынды ла, ул Азаматты ҡыуып сығарҙы.

Р. ИҪӘНБИРҘИН.

Фото: 1043wowcountry.com