Әсәйҙән кәнфит таптыра:
– Икәү булһын, әсәй, – ти, –
Хәҙер бер генә малай ҙа
Шоколадһыҙ эсмәй, – ти.
Әсәй беҙҙе саҡыра ла,
Әй яғымлы һөйләшә:
– Бутҡағыҙ тәмле булһын, – тип,
Беҙгә ҡаймаҡ өләшә.
Ағайым һаман дауайлай:
– Ике ҡашыҡ булһын, – ти. –
Тәмлекәйҙе бик яратам,
Һәр ҡашығы тулһын, – ти.
Фәрғәт ағайым балды ла
Гел ала ике ҡашыҡ.
Ҡашыҡтары тулманиһә
Тора ул башын ҡашып.
Тик мәктәптән бойоҡ ҡайтты,
“Ике”не сәпәгәндер.
Ахырыһы, ул бында ла
Икәү булһын, тигәндер.
Тылсымлы көҙгө
Быйыл Фираяға беренсе кластарҙы бирҙеләр. Уҡыусылар араһында игеҙәктәр ҙә бар. Уларҙың береһе – ҡыҙ, икенсеһе – малай. Малай – шалапай, өй эштәрен үтәһә үтәй, үтәмәһә – юҡ, онота ла ҡуя. Фирая ҡыҙ туғанынан ялҡаулыҡтың сәбәбен асыҡларға тырыша.
– Апай, ул мәктәптән ҡайта ла урамда уйнап тик йөрөй. Әсәй-атайға ҡарыша. Кәнфит һурыуҙан, һағыҙ сәйнәүҙән бушамай. Иртән битен йыумай, сәсен тарамай, атайым портфелен эҙләп алып бирә, – тип теҙә генә.
Малайҙы тура юлға баҫтырыу өсөн, Фирая кеҫәһенән көҙгө сығара ла: “Атай-әсәйеңде тыңламағаныңды көҙгө әйтеп бирәсәк”, – ти. Ҡыҙ туғаны һөйләгәндәрҙе уға еткерә.
Иртәгеһен малайҙы алыштырғандармы ни? Бөхтә итеп кейенгән, сәсе алынған, тырнаҡтары киҫелгән, дәрестәре әҙерләнгән. Шулай булмай мөмкин түгел, сөнки тылсымлы көҙгө барыһын да һөйләп тора бит.
Флүрә ХӘЛИЛОВА.
Ғәли менән Кәли
– Ғәли, һыуытҡыста ике киҫәк торт бар ине, әле берәү генә. Ҡайҙа булды икән, белмәйһеңме?
– Беләм, әлбиттә! Ҡараңғы ине, икенсеһен күрмәгәнмен.
***
– Ғәли, мин һиңә башта бер ҡуян, шунан икене, аҙаҡтан өстө бирһәм, бөтәһе нисә була?
– Ете!
– Иғтибар менән тыңла! Башта бер, шунан ике, иң һуңынан өс. Нисә?
– Ете!
– Дөрөҫ түгел! Әйҙә башҡа нәмә менән ҡушып ҡарайыҡ. Бер алма плюс ике алма плюс тағы ла өс алма! Нисә?
– Алты!
– Дөрөҫ! Ә хәҙер ҡуяндарҙы ҡушабыҙ. Бер ҡуян плюс ике ҡуян плюс өс ҡуян. Нисә?
– Ете!
– Ни өсөн?
– Беҙҙең бер ҡуян бар инде.
***
– Кәли, һин балыҡтарҙың һыуын алмаштырҙыңмы?
– Юҡ әле, элеккеһен эсеп бөтмәгәндәр.