Бер нисә кеше кеҫәһенә тығылды. Әхмәтзыя ағай ғына һис нәмәгә иҫе китмәгәндәй, тын ғына ултырҙы. Шофер уны ла иғтибарынан ситтә ҡалдырманы:
– Ә һин, ағай?
– Тикшерһәләр ни, тикшерһендәр. Төрлө тикшереүҙәргә өйрәнеп бөткәнбеҙ инде, – тине уға ҡаршы Әхмәтзыя.
Пассажирҙар, уны яҡлапмы, ҡыланышын хупламауҙанмы, дәррәү һүҙгә ҡушылды:
– Пенсионерҙыр...
– Ветерандыр...
– Әллә герой уҡмы?..
Әхмәтзыя ағайға был оҡшаманы, кеҫәһенән ҡыҙыл тышлы таныҡлыҡ алып, баш осонда һелкеп күрһәтте:
– Бына һеҙгә билет! – Бер аҙҙан һәммәһенә асыулы ҡараш ташлап өҫтәне: – Молчать!
Автобус ҡуҙғалып китте.
Иртәгеһен Әхмәтзыя ағайға йәнә шул уҡ автобусҡа ултырырға тура килде. Салонда кеше әҙ ине. Шофер кисәге ваҡиғаны онотмағайны, күрәһең, ҡыҙыҡһынып һораны:
– Ағай, ниндәй таныҡлыҡ күрһәттең ул?
– Ғәмәлдән сыҡҡан партбилет! Мин бит элекке коммунист!
Рәйес РИЯНОВ.