Баланың ҡулына хәтфә кишер кейҙерелә, тейешле режим ҡуйыла. Ҡуян яғымлы ҡатын-ҡыҙҙар тауышы менән уйнарға теләүен хәбәр итә лә бала артынан йөрөй башлай… Ошо мөғжизәле дошман техниканы ҡустыма бүләк иттем.
Яңы йыл төнөндә еҙнәм ныҡ ҡына төшөргән. Телевизор алдындағы келәмдә ятып йоҡлаған. Уята алмағандар. Шунан ҡатыны ҡуянға нимәлер яҙҙырған, кишерҙе һөйгәненең ҡулына таҡҡан. Еҙнәм 1 ғинуарҙа сит тауыштан уянып киткән:
– Зариф… Зариф… Ниңә ләх булғансы эстең?
Күҙҙәрен асһа, алдында – зәңгәрһыу-йәшел ҡуян! Еҙнәм күҙҙәрен бер нисә тапҡыр асып йома, ҡуян юғалмай, тәтелдәй ҙә тәтелдәй. Ҡото алынған ир әкрен генә шыуыша, ә электрон ҡәбәхәт ҡыуана: “Әйҙә, уйнайбыҙ! Һин ҡас, мин эҙләрмен”. Һәм йырлай-йырлай уның артынан эйәрә. Еҙнәм саҡ йән бирмәй…
Б. СУЛПАНОВ.