Уға иғтибар итеүсе юҡ, теге икәү һаман үҙ-ара һөйләшеүен белә.
– Мин – прозаик! – тип һүҙ ҡыҫтыра йәнә Рәлис.
– Про каких заек? – тип ҡыҙып китә Дамир. – Беҙ бит шиғриәт тураһында һөйләшәбеҙ, ә про заек түгел...
Һаҡал
Р. исемле шағир бер саҡ тыуған ауылында ятып, Өфөгә һаҡал үҫтереп килә.
– О-һо, һаҡал үҫтереп ебәргәнһең икән, – ти уға дуҫтары.
Теге шағир күкрәк кирә биреп:
– Рауил Бикбаевҡа оҡшарға теләйем, – тип ебәрә.
– Рауил Бикбаевҡа оҡшар өсөн һаҡал түгел, аҡыл үҫтерергә кәрәк...