"СВОЯ ПОЛЯ"

Бер тракторсы ДТ-75-ендә бер баҫыуҙы һөрөп бөтөрөп, икенсеһенә китеп бара икән. Ҡаршыһына “Нива”­һында етәксе килеп сыға ла:
– Ҡайҙа китеп бараһың, ҡустым? – тип һорай.
– Своя поляға барам, – ти механизатор.
– Бирермен мин һиңә свое поле, – тип ҡыҙып китеп әрләргә тотона етәксе, – былай ҙа техника етмәй, ә һин үҙеңдең картуф­лы­ғыңды һөрөргә китеп бараһыңмы әле?!
Ай-вайына ҡарамай, тракторҙы МТМ-ға ултырттыра был. Трак­торсының ауыҙынан спиртлы эсемлек еҫе лә килгән була.
Яңы ғына килеп, эш башлаған йәш хужалыҡ етәксеһе, хужалыҡ менән күрше өлкә сигендәге был баҫыуҙың халыҡта Своя поля тип йөрөтөлөүен белмәгән.
Совет осоронда бер йыл баҫыуҙы былар эшкәрткән, икенсе йылы – ырымбурҙар. Русса насар һупалаған башҡорттар, баҫыуға Своя поля тип атама биргән, бүтән берәүгә лә бирмәгән. Үҙҙәре генә сәсә башлаған.

Азамат ХИСМӘТУЛЛИН.