Чаттың администраторы Динара Рәмил ҡыҙы тигән берәү яҙып та һалды:
– Хөрмәтле баҡсасылар! Һеҙҙе берләштереү өсөн чат астыҡ! Әйҙәгеҙ танышайыҡ! Кем башлай?
Төрлө яҡтан яуаптар яуҙы:
– Мин – 132-се участканан Рабиға. Кейәүҙә түгелмен.
– Ай, Хоҙайым! Тағы бер чат!
– Нишләп мине һорамайса индерҙегеҙ бында? Юйығыҙ номерымды!
– Һыуҙы нисәлә бирәләр икән?
– Ҡайҙа һыра һатыла ул? Кем белә?
– Баҡсаға ингән ерҙә бесәй йөрөй. Кем бесәйен ташлап китте? Эттәр!
– Бынан нисек сығырға?
– Нисек сығырға тием?
– Сығарығыҙ мине!!!
– 132-се участканан Рабиға! Мин 72-се участкала. Өйләнмәгәнмен.
– Бөтөн баҡсала ямғыр яуҙы, минең участок алдында ғына һыу ята. Ни өсөн? Аңлатығыҙ?
– Баҡсаға ял итергә килдем. Ниндәй чат тағы?
– Райман, әйҙә кил. Ҡатының белмәһен өсөн участка һанын яҙмайым.
– Мин аҡса йыймайым! Әсәйҙәр, һеҙ шашып киттегеҙ, ул ниндәй бөтмәҫ тыуған көн?
– Ой, чаттарҙы бутағанмын, ғәфү итегеҙ...
– Баҡсала интернет насар тота, алмағасҡа менеп яҙам.
– Кисә минең эргәнән ҡыҙыл Ниссан Жук-та елдереп үткән ҡыҙ, һеҙҙең машинала кардан туҡылдай. Ремонт 12-се участкала.
– Еҙ самауыр һатыла. Ҡайын миндектәре.
– Төн уртаһында ниндәй иҫәр чат асты?
– Төн уртаһында ни эшләп яҙаһығыҙ һуң чатҡа?
– Һинән һорайыммы инде?
– Дуҫтар, мәҙәниәтле булайыҡ!
– Мәҙәниәтлеләр йоҡлай был ваҡытта!
– 132-се участканан Рабиға, мин һиңә сыҡтым. 20 минуттан булам.
– Кем һыра эҙләй ине? Таптығыҙмы? Беҙгә лә кәрәк.
– Бесәй балалары таратам. Бушлай.
– Кемдәрҙең баҡсаға бурысы бар, шуларға һыу туҡтатыласаҡ. Администрация.
– Хәйерле иртә, дуҫтар! Уңышлы көн барығыҙға ла!
Тағы күпме булыр был чаттар?
Миләүшә ҠАҺАРМАНОВА.