"ҺӘНӘК" күҙлегенән

Башҡортостанда

Учалы ҡалаһында ер аҫты байлыҡтарын файҙаланыу буйынса ведомство-ара комиссия ултырышы булып үтте. Республикала элегерәк 67 компанияның алтын эҙләүгә хоҡуғы булһа, 13-нөң лицензияһы тартып алынған, биш енәйәт эше ҡуҙғатылған. Төбәк башлығы Радий Хәбиров әйтеүенсә, Учалы һәм Баймаҡ райондарында хәл айырыуса сетерекле, шул уҡ ваҡытта ҡайһы бер предприятиелар етәкселәре, хөкүмәт ҡуйған талаптарға ҡолаҡ һалмай, ер аҫты байлыҡтары сығарыуҙа вәхшиҙәрсә ысулдар ҡуллана.
Күрәһең, ер аҡтарып байлыҡ эҙләгән әҙәмдәрҙең күҙенә алтындан башҡа бер нәмә лә салынмай.

Рәсәйҙә

Һуңғы осорҙа ил халҡын барыһынан да бигерәк нин­дәй хәл борсой, тиһегеҙме? Хаҡтар артыуы, махсус хәр­би операция һәм ҡорбан­дар һаны, Рәсәйҙең әле бер, әле икенсе төбәгендә ҡуп­ҡан көсөр­гәнешле хәлдәр... Юҡ, белмә­негеҙ – Твикс ҡушаматлы бесәй яҙмышы!
Бер егет бесәйе өсөн махсус рөхсәт ҡағыҙы алып Екатеринбург-Санкт-Петербург поезына ултыра. Киров ҡала­һын­дағы станцияла поезд хеҙмәткәре бесәйҙе, берәҙәк тип уйлап, тышҡа сығарып ебә­рә. Мәхлүктең үлеүе мәғ­лүм булғас, мәх­шәр ҡуба. Дәү­ләт Думаһы депутаттары, социаль сел­тәрҙәрҙә меңәр­ләгән кеше­ләр, шул иҫәптән бөтә илгә билдәле шәхестәр, кем­уҙарҙан ошо ҡыҙғаныс хәл­гә үҙ баһаларын бирергә ашыҡ­ты. Бесәй үлемендә ғәйеплене хөкөмгә тартты­рыуҙы һорап яҙған пе­ти­цияға 300 меңдән ашыу кеше ҡул ҡуйып та өлгөргән. Хәҙер иһә депутаттар йорт хайуандарын транспортта йөрөтөү буйынса за­кон­дарҙы яңыр­тырға йыйына.
Рәсәйҙә көнөнә биш мең­гә яҡын кеше вафат була, уларҙы белмәйбеҙ, ә бесәй­ҙе йәлләй­беҙ. Беҙҙә ҡаты һы­уыҡта өшөп, асығып үл­гән асарбаҡтар әҙме, юғиһә. Ошо теманы күтә­реү­­селәр араһында шәп фантастар ҙа осрай. Әйтә­йек, бер “аҡыл­­лы баш” фекеренсә, бесәй хужаһы оҙон һаҡал йөрөтә, тимәк, ул – ваххабит һәм ошо фажиғә аша илде тар­ҡа­тырға һәм милләт-ара ыҙ­ғыш тыуҙырырға тырыша, ә уның артында көнбайыш капиталистары тора. Йә, Хоҙай, шундай “аҡыллы” бәндә­лә­реңде үҙең ярлыҡа!
Ә бесәй йәл – ғүмере ҡыҫҡа булды.