Бер көндө

Тара­ҡан ботондай шрифттар тип тә бор­сол­майһың, бармаҡ менән шыл­дырҙыңмы, бар яҙыуҙар ҙурая, – тип теҙеп һалды.
– Һуң, ҡуллана белмәйем дәһә, – тип аптырап ҡалдым.
– Һи, ул ғына! – барыһы ла аҡланып маташыуыма ҡул һелтәп кенә ҡуйҙы­лар. – Хәҙер әүҙем ҡулланыусыға әй­ләндерәбеҙ һине. Төшөнөп алһаң, бер ҡыйынлығы юҡ уның.
Ейәнем миңә ен­текләп был төй­мә­һеҙ электрониканы энәһенән ебенә тиклеп өйрәтеп бир­ҙе, яҙып, инструкция ла биреп ҡалдыр­ҙы. Хәҙер ултырып яңы техно­­ло­гия­ларҙы үҙләш­терергә була.
Күрсе, булдырҙым даһа, алдымда – яңылыҡтар таҫмаһы. Ҡарап ҡарайыҡ, донъяла ниҙәр бар? Уҡыйым:
«Бөгөн – ҡарғаларҙы һанау көнө».
Ниндәй генә дата-байрамдар юҡ бөгөн?! Иҫең китерлек! Ҡоймаҡ көнө, Алкоголиктар көнө, Йоҡо көнө, Селедка көнө, Ерән сәслеләр көнө булһынмы ул... Дауам итһәң, тештәрең ҡойолоп төшкәнсе һанап бөтмәҫһең. Нисек был хаҡта белмәй, бик тә мөһим көндәрҙе билдәләмәй, байрам итмәй ҡартай­ғанбыҙҙыр инде? Ярай, булһын да, ти, артабан уҡыйым.
«Был көндә иғтибарлы, йыйнаҡ булыр­ға, иң мөһиме, ҡарғаларға тей­мәҫкә кәрәк».
Шул да булдымы яңылыҡ?! Кемгә кәрәк ул? Икенсеһенә баҫам.
«Республиканың иң популяр йырсы­һы Элвин Яндырай үҙенең иге­ҙәген осратҡан! Эксклюзив яңылыҡ! Ҡара­май үтмәгеҙ!»
Һы, быныһы нимә тигән хәбәр? Ҡарап ҡарайыҡ һуң.
«Һин дә мин йәшәп ятҡан Элвин Яндырай игеҙәгенә тап булыуын бел­дер­ҙе социаль селтәрҙәге сәхи­фә­һендә. Берҙән-бер көндө әртис, баҡтиһәң, көҙгөгә ҡараған...»
Эйе шул, был хаҡта белеү беҙҙең өсөн бик мөһим. Мәғлүмәт өсөн ҙур рәх­мәт. Экрандан бармаҡты өҫкә үт­кәрәм.
«Шок! Был яңылыҡ республика хал­ҡын тетрәтте! Киләһе яҙмала уҡығыҙ».
Тәк-тәк.
«Архангел ауылында йәшәүсе ир йә­шерен рәүештә күршеһенең өйөнә инеп, уның телефоны менән файҙа­ланып йөрөгән».
Тфү! Яҙманың атамаһынан ҡараған­да бер хәбәр, ә эстәлеге буйынса бөтөнләй башҡаса. Тәү ҡарамаҡҡа мөһим һымаҡ, уҡый башлаһаң, ваҡ-төйәк, буш нәмә, буш ҡыуыҡ. Башты бутайҙар!
«Яңы закон үҙ көсөнә инде. Әйтмә­не­ләр, тимәгеҙ: был барыһына ла ҡағыла».
Ниһайәт, аҡылы камил булған автор­ҙан яңылыҡ. Әлбиттә, яңы закон менән танышыу зарур.
«Ҡороған ағастар «ағас материалдары» категорияһынан сығарыла һәм закон ҡабул ителгәндән алып ағас булмаған ресурстарға ҡарай. Уны урмандан бушлай йыйып алып сығырға мөмкин була».
Төкөрөгөмә сәсәй яҙҙым. Ысынлап та, үтә лә мөһим яңылыҡ! Был хаҡта белмәй артабан нисек йәшәмәк кәрәк?
«Макрондың ҡатыны элек ир бул­ған­мы? Америка жур­налисының фаш итеүҙәре»; «Ябығырға теләү­селәр өсөн ризыҡ. Уны төнөн дә ашарға ярай»; «Йо­морт­ҡаға хаҡтар ни өсөн арта? Белгестәр серҙе аса»; «Сахалинда һуҡыр инвалидҡа страховка фонды чиновниктары телевизор бүләк итте»; «Ҡы­тай­ҙа ҡатын урамда бала тапҡандан һуң артабан мага­зин­ға йүнәлгән».
Ыстырам! Күҙлегемде си­сеп, өҫтәлгә һалам. Бөгөнгө көн яңылыҡ­тары... Һабын кү­бе­ге. Уҡығас та онотола.
Бына беҙҙең заманда була торғайны яңылыҡтар: Әй йыл­ға­һында күпер төҙөлөп бөттө, фәлән ауылда мәктәп асылды, космосҡа яңы юлдаш сыға­рылды, бөтә ил уҡытыу­сылары слёты уҙҙы... Уҡығандан һуң яҡшы кәйефтә, ғорурлыҡ кисереп, дәртләнеп эшеңә тотонаһың.
Ә хәҙер нимә тураһында һүҙ сурыталар? Ҡайһы әртис башҡаларҙан айырылып тороу өсөн концертҡа нин­дәй ыштан кейеп сыҡҡан йә иһә кей­мәй сыҡҡан. Фәлән ҡалала ҡатын элекке ирен фашларға теләп, уға фәхишәләр ебәреп ятҡан. Өфөлә ҡот­ҡарыусылар һи­ге­ҙен­се ҡаттан тәҙрә аша төшөргә теләгән ирҙе ҡотҡарған­. Бер сәғәт­тән һуң ир ҡабат етенсе ҡат тирәһендә бауҙа эленеп торған... Бер йүнлеһе юҡ. Күңелде ҡара һөрөм баҫып ала. Бындай яңылыҡтарҙы уҡыуыңдан уҡымағаның яҡшы.
Кит, ошондай йәшәү рәүешенә, фекерләү ҡеүәһенә килтереп терәт­теме замана технологиялары?! Тумба­ның иң аҫҡы кәштәһенә тығып ҡуйҙым пелән­шетте. Балалар килгәндә, сығарып күр­енгән урынға һалырмын әле.
Өҫтөмә курткамды эләктерҙем дә, кеҫәне ҡапшап ҡарағас, гәзит алырға сығып киттем.

Фәиз ХАРРАСОВ.