"ҺӘНӘК" күҙлегенән

Ҡыҙыҡ та, ҡыҙғаныс та: реформаларға яуаплы итеп тәғәйенләнгән ҡайһы бер етәкселәр бурыстарын үҙҙәренсә аңлай ҙа ҡуя – күҙенә аҡ-ҡара күренмәй урлашырға ғына белә.
Былтыр ил буйынса коррупцияла ғәйеп­ләнгән ун меңдән ашыу төрлө кимәлдәге етәксегә, шулай уҡ депутаттарға, про­ку­рор­ҙарға, судьяларға енәйәт эше асылған. Уларҙың күбеһе ҙур суммаларҙа ришүәт алыуҙа ғәйепләнә, ти Рәсәйҙең Тәфтиш комитеты етәксеһе Александр Бастрыкин. Ҡыҙыҡ, улар урлашмаһын өсөн эш хаҡтары күпме булырға тейеш икән? Бахырҙар, ярты миллион һум (Дәүләт Думаһы депутатының айлыҡ эш хаҡы) ғына ала бит улар. Был аҡсаға нисек йәшәргә мөмкин?

ДОНЪЯЛА

Исландиялағы Рейкьянес яры­мут­рауында 800 йыл “йоҡ­лап ятҡан” вулкан уянған. Гриндавик ҡалаһында йәшәүсе ха­лыҡ башҡа төбәктәргә күсенә, ҡала властары теләүселәрҙән баҙар хаҡына йорттарын һатып ала – вулкандың ҡаланы тотошлай юҡ итеүе лә ихтимал.
Һуңғы айҙа ғына Японияла, Эквадорҙа, шулай уҡ Рәсәйҙә Сахалин өлкәһендә вулкандар “уянған”. Һуңғы осорҙа төрлө илдәрҙә барған һуғыштар, ке­шенең тәбиғәткә иҫ киткес зыян килтереүе, урмандарҙы ҡырыуы Ер-Әсәнең асыуын ҡабартмай­мы икән?

БАШҠОРТОСТАНДА

Һүҙҙе көләмәстән башлайыҡ. Йәше-ҡарты “Һаумыһығыҙ, ауыл­даштар” байрамына йы­йылған. Байрамдың иң ҡыҙған сағында бер нисә ке­шенең хәле хөртәйгән. Берәү­ҙәр ба­шын, икенселәр йөрәген тотоп хәлһеҙләнеп ята, берҙән-бер фельдшер, ни ҡылырға белмәй, йүгергеләп йөрөй.
Шунда бер аҡыллыһы ҡыс­ҡырып ебәрә:
– Был ҡунаҡтар Салауат ҡала­һынан килгән бит. Беҙҙең һулап туйғыһыҙ саф һауа килешмәй уларға! Машина­ларығыҙҙы тоҡандырығыҙ ҙа, газ еҫкәтегеҙ, хәҙер терелеп китерҙәр!
Шулай итәләр ҙә. Ғәжәп, ауы­рыуҙар йәһәт аяҡҡа баҫа, бер ни булмағандай байрамды дауам итәләр.
Көләмәстәр тормош ерле­гендә тыуа. Стәрлетамаҡ, Салауат ҡалалары халҡы йәнә тын алғыһыҙ еҫкә зарлана. Рәсәй­ҙең тәфтиш комитеты етәксеһе Александр Бастрыкин хәлде үҙ контроленә алды һәм ғәйеп­леләрҙе асыҡларға ҡушты. Рес­пуб­ликаның Тәбиғәттән фай­­ҙа­ланыу һәм экология ми­нистрлығы иһә март айының ҡайһы бер көндәрендә бензол, сероводород һәм ксилол кеүек ағыулы матдәләр буйынса күр­һәткестәр норманан байтаҡҡа күберәк булыуын теркәгән. Быныһы инде көләмәс кенә түгел.