+30 °С
Облачно
Яңы "Һәнәк"!
17 Апреля 2025, 05:00
"Һәнәк" күҙлегенән
Башҡортостанда Беҙҙең илдә ауыл хужалығында ике төрлө бәлә бар: уңыштың әҙ һәм... мул булыуы. Республиканың байтаҡ райондарында былтырғы шәкәр сөгөлдөрө баҫыуҙарҙа һаман өйөлөп ята. Баҡһаң, татлы тамырҙы 2,5 миллион тонна йыйып алғандар, ә республикалағы ике завод бергәләп 1,6 миллион тонна ғына эшкәртә ала. Ә уны төбәктән ситтәге заводтарға ташыу ҙа мөмкин булмаған эш. Беренсенән, юл сығымдары күп, икенсенән, уларҙа ла уңыш мул, ҡолас йәйеп ҡаршы алмайҙар. Ҡыҙыҡ та, ҡыҙғаныс та: республикала элек дүрт шәкәр сөгөлдөрө заводы бар ине. Ҡарлыман заводы тиҫтәләрсә йыл элек, Мәләүездәге өс-дүрт йыл әүәл ябылды. Беҙгә ике завод та етә, шәкәр былай ҙа республика халҡы ихтыяжынан ете тапҡырға күберәк етештерелә, тинеләр. Баҡһаң, етмәй. Бына хәҙер татлы тамыр өйөмдәре хужаһыҙлыҡҡа һәйкәл булып баҫыуҙар тулып ята.
"Һәнәк" күҙлегенән
Рәсәйҙә
Ханты-Манси автономиялы округы губернаторының беренсе урынбаҫары миллиондарса һум ришүәт алыуҙа ғәйепләнеп ҡулға алынған. Карелия республикаһының ауыл хужалығы һәм балыҡсылыҡ буйынса министры Владимир Лабинов ришүәт алған өсөн 15 йылға иркенән мәхрүм ителгән, өҫтәүенә дәүләт файҙаһына 106 миллион һум штраф түләргә тейеш. Был исемлекте бик оҙаҡ дауам итергә мөмкин булыр ине. Рәсәйҙең Оборона министрлығында ғына нисәмә генерал коррупцияла ғәйепләнә. Рәсәйҙең Тәфтиш комитеты урлашыуҙы кәсептәре иткән төрлө кимәлдәге етәкселәрҙе фашлап өлгөрә алмай. Коррупцияға ҡаршы көрәш буйынса милли комитет рәйесе Кирилл Кабанов фекеренсә, бының төп сәбәбе – байығырға ынтылыу. Ҡыҙыҡ, ай һайын миллионлап эш хаҡы алған эреле-ваҡлы етәкселәр һаман байымаған икән. Бәлки, уларҙа закон алдында яуап биреүҙән ҡурҡыу тойғоһо юғалғандыр, бәлки, Ҡытайҙағы һымаҡ, коррупцияға батыусыларҙы стенаға терәп атырға ваҡыт еткәндер?!
Донъяла
Бөтә донъя һаулыҡ һаҡлау ойошмаһы 45 йәшкә тиклемге кешеләрҙе йәштәр иҫәбенә индереү тураһында ҡарар ҡабул итте. Рәсәйҙә иһә рәсми рәүештә был категорияға 14 йәштән 35 йәшкә тиклемгеләр инә.
Әлбиттә, һәр кемдең йәш көйөнсә ҡалғы килә, әммә Африканың байтаҡ илдәрендә уртаса ғүмер оҙонлоғо алтмышҡа ла етмәй, икенсенән, ҡырҡ биш йәштә күптәр олатай-өләсәй була түгелме? Йәшәртәләр генә беҙҙе, оҙаҡламай барыбыҙ ҙа һаҡаллы сабый булып йөрөрбөҙ, ахыры. Былар йәш, тип, пенсияға сығыу ваҡытын ғына өҫтәп ҡуймаһындар.
