"ҺӘНӘК" күҙлегенән

РӘСӘЙҘӘ

Ауыл хужалығында ил буйынса 6 миллион самаһы кеше эшләй, рәсми мәғлүмәттәр буйынса бөгөндән 200 меңдән ашыу хеҙмәткәр талап ителә. Кадрҙар ҡытлығын хәл итеү өсөн Рәсәй Хөкүмәте дүрт дәүләт программаһына үҙгәрештәр индерҙе, белгестәр әҙерләүсе колледждарға ярҙам, гранттар суммаһы, мәктәптәрҙә агрокластар һаны ҡырҡа артасаҡ тип көтөлә. Ғөмүмән, тормошҡа ашырға тейешле уй-ниәттәре бик күп.
Бындай хәстәрлек ҡыуаныс ҡына уята һәм күңелдә бер генә һорау тыуа. Ни өсөн ауыл хужалығына ҙур ярҙам саралары элегерәк, ауылдар гөрләп, йәштәр тулып йөрөгән саҡта булманы икән? “Рух” төркөмөнөң киң билдәле йырында нәмә тип йырлайҙар әле: “Өлгөрмәнем, өлгөрмәнем”...

ДОНЪЯЛА

Ҡытай коррупцияға ҡаршы көрәш буйынса күптәргә өлгө булып тора. Власҡа 2012 йылда Си Цзиньпин килгәс тә өс йыл эсендә миллиондан ашыу чиновник хөкөм ителә, шул иҫәптән йөҙләп министр, ҡала мэрҙары, провинция етәкселәре. Урлашып тотолған ҙур етәкселәрҙе стенаға терәп атыуҙы үҙәк телевидение тура эфирҙа күрһәтә, әҙер генә торған табиптар кәүҙәһе һыуынып та өлгөрмәгән мәйеттең органдарын алып, дауаханаларға оҙата. Ришүәтсенең ғаилә ағзаларының, яҡын туғандарының да мөлкәте дәүләт иҫәбенә тартып алына. Иң күп язалау осрағы 2009 йылда теркәлә: Олимпиада объекттарын төҙөүҙә мутлашҡан 150 эшҡыуарҙы бер көндә аталар.
Ҡытайҙан өлгө алып, Рәсәйҙә лә ҡаты закондар булдырырға кәрәк, тиһегеҙме? Тик быға күптәр ҡаршы. Беҙҙә демографик хәл бик хөрт, урлашҡан, ришүәт алған кешеләрҙең барыһын да ата-ултырта башлаһаң, илдә... кеше ҡалмаясаҡ икән.