-4 °С
Болотло
Бөтә яңылыҡтар
Яңы "Һәнәк"!
12 Март , 15:11
"ҺӘНӘК" күҙлегенән
БАШҠОРТОСТАНДА Өфөләге музыка мәктәбенә төндә килеп янъял ҡуптарған иҫерек егетте Росгвардия вәкилдәре ҡулға ала һәм таң атҡансы ябып ҡуя. Был егет – Мәскәүҙәге “ЦСКА” командаһынан “Өфө” футбол командаһына аренда ысулы менән яңы ғына күскән 25 йәшлек Илья Агапов булып сыға. Ул иһә ғәҙәттән тыш хәлгә тарыуын бөтөнләй икенсе төрлө аңлата. Илья айныҡ була, урамға сыҡҡас та такси саҡырта, әммә уныһы килмәгәс, йылынып сығырға уйлап, әҙәпле генә итеп мәктәп ишеген ҡаға. Әммә ҡарауылсы уны хулиган тип ҡабул итә һәм тәртип һаҡсыларын ярҙамға саҡыра. Шулай итеп, ниндәйҙер мөғжизә менән иҫерек хулиган ғәйепһеҙгә әүерелә. “Һәнәк”тең фаразы буйынса, хәл былайыраҡ булған. Футболсы, туп үҙен бик тыңламағас, музыкаль мәктәпкә килеп, тиҙ арала берәй инструментта булһа ла уйнарға өйрәнеп, яңы коллективын шаҡ ҡатырырға уйлаған, тик уның изге ниәтен ҡарауылсы ҡатын ғына аңламаған. Уйнарға өйрәнмәһә лә отолманы спортсы егет, хәҙер уның исеме бөтә Башҡортостан, хатта ил теленән төшмәй. Юҡһа кемебеҙ “Өфө” футбол командаһын, уның уйынсыларын белә ине?!
"ҺӘНӘК" күҙлегенән
РӘСӘЙҘӘ
Рәсәй Эске эштәр министрлығында барлығы 200 мең самаһы хеҙмәткәр етмәй икән. Өҫтәүенә был һан йылдан-йыл арта бара. Айырыуса патруль-пост, участка инспекторҙары етешмәй. Екатеринбург ҡалаһында полиция хеҙмәткәре менән ярҙам өмөт итеүсе араһында түбәндәге диалог була:
– Зинһар өсөн, наряд ебәрегеҙ!
– Ҡыҙғанысҡа ҡаршы, әле берәү ҙә юҡ!
– Һеҙ полициямы, юҡмы?
– Кеше юҡ беҙҙә, 16 кеше урынына икәү эшләйбеҙ!
Эш хаҡының түбән булыуы – полицияла эшләргә теләүселәрҙе өркөтөүсе иң ҙур сәбәп икән. Шул уҡ ваҡытта ведомствола коррупция осраҡтары йыш асыҡлана. Бер генә миҫал: яңыраҡ Санкт-Петербургта миллиондарса һум ришүәт алған өс генералды иркенән мәхрүм иттеләр. Генералдар урлашмаһа, бәлки, эш хаҡтары ла етерлек күләмдә булыр ине. Тик улар туя белмәй шул.
ДОНЪЯЛА
Донъяла һис тә тыныслыҡ юҡ. Америка Ҡушма Штаттары Венесуэла президентын “урлап” алып сығып, илдә үҙҙәренә уңайлы власть урынлаштырырға ынтыла. Уңышлы операциянан дәртләнгән Дональд Трамп үҙен донъя хужаһы итеп тоя башланы, буғай. Израиль менән берлектә Иранға һөжүм итеп, тиҫтәләгән илдең тыныс тормошон боҙҙо. Сөнки 80 миллиондан ашыу кеше йәшәгән, яҡшы ҡоралланған Иран еңел генә бирелмәйәсәк. Сит илдәрҙә урынлашҡан Америка базаларын утҡа тота, Израилгә ракеталарын осора. Эштәр былай барһа, өсөнсө донъя һуғышы ҡупмаҫ тимә. Ҡыҙыҡ та, ҡыҙғаныс та: кешелек донъяһының яҙмышы Трамп, Нетанъяху кеүек һуғыш суҡмарҙарына бәйле.
Новости партнеров