+10 °С
Болотло
Бөтә яңылыҡтар
Яңы "Һәнәк"!
30 Март , 10:30
ХАТАҺЫҘ ХАТА
Филология факультетында уҡыһаң, һин — сит планета вәкиле кеүекһең. Сөнки аудиторияла 30 гүзәл ҡыҙ һәм... бер мин. Дүрт йыл буйы ҡыҙҙарҙың диктанттарын күсереп, «синтаксис» менән «пунктуация» араһында башым әйләнеп йөрөп, мин үҙемдең баҙнатһыҙлығым арҡаһында берәүгә лә өндәшә алмай инем.Ләкин быйылғы яҙ башымды бөтөнләй ашаны. Бергә уҡыған ҡыҙға ғашиҡ булдым. Исеме — Гөлназ. Күҙҙәре — күк йөҙө! Көнө-төнө репетиция яһайым, нисек һүҙ ҡушырға тип уйлайым. Ахырҙа, батырлығымды йыйып, телефонды алдым.
ХАТАҺЫҘ ХАТА
«Ҡәҙерлем, мин һине беренсе күреүҙән яраттым. Дүрт йыл буйы йөрәгемдә йөрөттөм, бүтән түҙәр хәлем юҡ. Минең менән булсы...» — тип яҙҙым да, ҡалтыранған бармағым менән «Отправить» төймәһенә баҫтым.
Шул секундта донъя туҡтап ҡалғандай булды. Телефоным «дзың-дзың» итеп шартларҙай булып тауышлана башланы. Ҡараһам... Мин хәбәрҙе Гөлназға түгел, ә беҙҙең төркөмдөң «Филологтар-2024» тигән дөйөм чатҡа ебәргәнмен! 30 ҡыҙ! Бөтәһе лә уҡыны!
Чат ҡайнай: «Кем ул?», «Беҙҙең араламы?», «Айрат, һин аҡылдан яҙҙыңмы?!». Ояттан ер тишегенә керергә әҙер инем. Аптырағандан телефонымды һүндереп ҡуйҙым.
Кистән яңынан ҡабыҙһам — тағы бер хәбәр. Беҙҙең курстағы иң тыныс, дүрт йыл буйы миңә һүҙ ҡушмаған әлеге Гөлназ яҙған. Ул да яңылыш чатҡа ебәргән:
«Айрат, мин дә һине дүрт йыл буйы яраттым. Ошо хәбәреңде уҡығас, йөрәгем ярылырҙай булды. Мин риза!»
Мин шаҡ ҡаттым. Күрәһең, ул минең дөйөм чаттағы хәбәрҙе үҙенә булыуын белгән!
Дүрт йыл һүҙ таба алмай йөрөгән ике филологты бер «хатаһыҙ» хата ҡауыштырҙы. Хәҙер беҙ бергә. Ә төркөмдәге 29 ҡыҙ әле һаман: «Айрат ул көндө кемгә яҙҙы икән?» — тип баш вата.
Байым РӘХИМ.
Новости партнеров