-9 °С
Болотло
Бөтә яңылыҡтар
Журналға инмәгәндәрҙән...
30 Ғинуар , 11:45
ӨШӨГӘН БАРМАҠТАР
Илгиз ИШБУЛАТОВ Ялдарҙа такси компанияһында үҙ машинамда таксист булып эшләп алғылайым. Иш янына ҡуш – бауыр аҫтынан ел үткәреп ҡайтам, аҡмаһа ла, бер аҙ аҡсаһы тама. Декабрҙең урталары ине шикелле. Ҡаланың иҫке кварталына саҡырттылар. Бер ҡартты ултыртып алдым. Икенсе адрес яҡын ғына.– Булды заманалар… – тип һүҙ башланы пассажир. – Ҡасандыр ошо мәҙәниәт һарайы сәхнәһендә, – тип күрһәтте ул билдәле бер йортҡа, – өлкә комитетының беренсе секретарын бейетеп йөрөгән саҡтар бар ине…– Шулаймы? – тием. – Һеҙ әллә музыкантмы?– Әҙерәк бар шунда. – Бабай көлөмһөрәп ҡуйҙы. – Баян, гармун, синтезатор күтәреп, күп йөрөлдө, туйҙарҙа. Элек бит, туй-фәлән үткәрәм тиһәң, хәҙерге ише, тамадалар булманы. Гармун да баян менән генә үтә ине байрамдар. Ике синтезатор, өс баян, әллә нисәмә гармун туҙҙырҙым. Туйҙарҙа уйнаған өсөн, бер тапҡыр ҙа аҡса һораманым. Туғандар, дуҫтар бит инде, уларҙың балалары… Эйе, ошонда һулға боролабыҙ...
ӨШӨГӘН БАРМАҠТАР
– Ыһы, – тием, иғтибарҙы юлдан ситкә бормай ғына. – Хәҙер ҙә уйнайһығыҙмы?
– Әллә ни ыратып булмай шул. Һөйәктәр һыҙлай, – пассажирым, йөн бейәләйен сисеп, кеҫәһен ҡапшай башланы. – Мине ошонда ғына ҡалдыр, улым. Рәхмәт! Мә.
Үрелеп ҡулаҡса һондо. Һонолған усыма ике ҡағыҙ йөҙ һумлыҡ менән бергә биш тимер ун һумлыҡтар килеп ятты. Ҡарттың тарамыш бармаҡтары ҡулыма әҙ генә тейеп алды... Уларҙан тимер һалҡынлығы килә ине...
Йәш сағында сатлама һыуыҡтарҙа бармаҡ өшөтөп гармун уйнап йөрөгән музыканттың бөгөнгө өшөгән бармаҡтарын нисектер йылытҡым килде лә бит, ләкин ул инде төшөп ҡалды – артынан бер ни әйтеп тә өлгөрмәнем хатта. Уның ҡулының һыуыҡлығы үҙемдең дә бармаҡтарыма күскәндәй булды. Бармаҡтарым ҡапыл өшөй башланы. Кеҫәмдәге бирсәткәмде кейеп алдым.
Шулай шул улар, пассажирҙар, һәр кеменә иғтибар кәрәк, күптәре, ошо ҡыҫҡа ғына ваҡыт эсендә лә һинең күңелеңә бәйләнеп өлгөрә. Бына телефоныма тағы бер заказ килеп төштө. Быныһы кем булыр икән?
Фото: яһалма интеллект
Новости партнеров