-4 °С
Ҡар
Бөтә яңылыҡтар
Төрлөһөнән
13 Март 2023, 10:00

Рәми сайтына рәхим итегеҙ!

«Башинформ» мәғлүмәт агентлығында Башҡортостандың халыҡ шағиры Рәми Ғарипов сайтының (ramigaripov.ru) исем туйы үтте. Ул күренекле шәхестең тыуыуына 90 йыл тулыу айҡанлы Башҡортостан Башлығы грантына Башҡорт телен һаҡлау һәм үҫтереү фонды, Башҡортостан Республикаһының тыуған яҡты өйрәнеүселәр йәмғиәте, Әхмәтзәки Вәлиди исемендәге милли китапхана тарафынан асылды.

Рәми сайтына рәхим итегеҙ!
Рәми сайтына рәхим итегеҙ!

Әлбиттә, был изге эшкә Рәми Ғариповтың балалары Гөлнара һәм Азамат Ғариповтар ҙа тос өлөш индерҙе. Баш мөхәррире – Өфө дәүләт сәнғәт институты доценты, филология фәндәре кандидаты Гөлсәсәк Саламатова, сайт асыуға «ЭНЕФСИ» ойош­маһы етәксеһе Әлфир Илбаҡтин да күп көс һалған.
– Атайыбыҙҙың ижади фонды менән һәр ҡыҙыҡһынған кеше таныша алһын ине, тигән хыялыбыҙ тормошҡа аша, уға һәм ижадына арналған сайт асыл­ды. Бының өсөн ойошторған, яр­ҙам иткән һәр кемгә ҙур рәхмәт әйтәбеҙ. Артабан ул йәш яҙыусылар, шағирҙар, ғөмүмән, Рәми Ғарипов ижадын яратыу­сылар, әҙәбиәт һөйөүселәр өсөн асыҡ майҙансыҡ булыр, тип ышанабыҙ, – тине Азамат Ғарипов.
– Атайыбыҙҙың архивын ҡәҙерләп һаҡлағаны өсөн әсәйебеҙгә рәхмәтлебеҙ. Унда балалар өсөн шиғырҙар һәм әкиәттәр, шулай уҡ үҙе йыйған халыҡ ижады ынйылары ла бар, – тип һүҙгә ҡушылды Гөлнара Рәми ҡыҙы.
Ысынлап та, Надежда Васильевна тормош иптәшенең ижадын айырым темаларға бүлеп, ҡәҙерләп һаҡлаған, үҙе машинкала баҫҡан, китап итеп сығарыуға әҙерләп, күбеһен баҫтырып өлгөргән. Быны Гөлсәсәк Дәүләтбай ҡыҙы ла билдәләп үтте.
– Рәми Ғариповтың халыҡ өсөн билдәле булмаған эшмәкәрлеге тураһында айырым һүҙ булыр әле. Ул бит I, II курстан һуң йәйге каникул осоронда республиканың Әбйәлил, Хәйбулла, Баймаҡ һәм башҡа райондары буйлап фольклор материалдары йыйып та йөрөгән. Һуғыш осоронда ҡатындары, туғандары яугирҙарға арнап сығарған йыр­ҙарҙы ла яҙып алған. Шулай уҡ Мәскәүҙә Әҙәбиәт институтында уҡыған йылдарында Ленин китапханаһына барып, ғәрәп­сә яҙылған эпостарыбыҙҙы кириллицаға күсергән, – тине ул.
Тимәк, туған телебеҙҙе данлаған күренекле шәхесебеҙҙең халыҡ өсөн асылмаған яҡтары ла бар. Уның шәхси архивын, ижадын өйрәнергә лә өйрәнергә кәрәк әле.
Әлфир Илбаҡтин белдереүенсә, проекттың төп өлөшө тормошҡа ашырылған, әммә уны даими рәүештә тулыландырырға кәрәк. Рәми Ғарипов шәхесенә ҡағылышлы мәғлүмәттәр­ҙе йыйыу дауам итә. Бәлки, кемдеңдер ғаилә архивында бығаса бер ҡайҙа ла баҫылмаған фотолары, уның яҙған хаттары, иҫтәлектәре һаҡланалыр. Шулар­ҙы тәҡдим итергә була.
Әйткәндәй, артабан Рәми Ғарипов сайтын уның исемен йөрөткән 1-се республика башҡорт интернат-гимназияһы алып барасаҡ. Үҙе уҡыған белем усағында «Рәми» медиаүҙәге бар, сайт башлап яҙыусы йәш ҡәләм тибрәтеүселәр өсөн дә һәйбәт май­ҙансыҡ булыр, моғайын.
Рәми Ғарипов сайтын Баш­ҡортостанда ғына түгел, бөтә Рәсәйҙә уңышлы проект, тип әйтергә мөмкин. Ысынлап та, сайт бик матур эшләнгән, ша­ғир­ҙың тормошона, ижадына ҡағылышлы бар мәғлүмәт бер урында тупланған. Киләсәктә башҡа әҙиптәребеҙгә арналған сайттар ҙа булдырылыр, тигән теләктә таралышты исем туйында ҡатнашыусылар.

Э. ҒӘЛЛӘМЕТДИНОВА.

https://yanshishma.com/articles/t-rl-n-n/2023-03-12/r-mi-saytyna-r-him-itege-3173866

Автор:
Читайте нас: