Лариса Долина миллиондарһыҙ ҡалған

Лариса Долина 200 миллион һум самаһы аҡсаһынан ҡолаҡ ҡаҡҡан. Төрлө матбуғат саралары мәғлүмәттәре буйынса, йырсы бынан бер нисә ай элек үк аҡса уғрылары тоҙағына эләккән. Мәскәүҙәге биш бүлмәле фатирын насар уйлы кешеләр ҡулға төшөрөргә самалай, шуға күрә уны һатып, аҡсаһын “хәүефһеҙ” иҫәпкә күсерергә кәрәк, тип ышандырғандар. Һөҙөмтәлә йырсы фатирҙы 112 миллион һумға һатып, аҡсаһын мошенниктарға күсергән. Бынан тыш, аферистар уның йәнә 70 миллион һум самаһы аҡсаһын сәлдергән.

Бында аңлашылмаған нәмәләр күп. Беренсенән, үҙ аҡылындағы билдәле кешенең эргәһендә уҡымышлы юрист булмағанмы, йәки кәңәшләшер дуҫтары табылмағанмы? Икенсенән, артистар беҙҙә шулай серегән баймы ни?

Бынан байтаҡ йылдар элек Лариса Долина республиканың иң ҡеүәтле предприятиеларының береһенең юбилейына килеп сығыш яһаған тиҙәр. Әлбиттә, бындай сарала артистар күп булған. Тик үҙебеҙҙең артистарға ихлас рәхмәт әйтеп, сәй эсереп ҡайтарғандар, ә Лариса Долинаға дүрт йыры өсөн дүрт миллион тотторғандар, ти әсе телдәр.

Булыуы бик мөмкин. Тик бына буштан килгән әйберҙең ҡәҙере юҡ, тиҙәр түгелме халыҡта?

Фото: dzen.ru