+8 °С
Болотло
Бөтә яңылыҡтар
Юмореска
13 Октябрь 2022, 15:00

“Һуҡҡан...”

Кис мәле, ашап ултырһам, еңгәмдән смс-хәбәр килеп төштө: “Ағайың һуҡҡан, кил әле”, – тигән. Туҡталышҡа еткәнсе, унан автобус эсендә бер бөртөк кенә ағайымдың артабанғы яҙмышы тураһында борсоуло уйҙар солғанышында булдым. Өйләнгәне бирле эсмәй йөрөй ине бит. Тағы башланымы икән ни? Эсһә, холҡо юҡ бит уның. Еңгәй ағайҙы эскән килеш күрәне лә юҡ, һаҡланһын инде. Ағайҙың әрменән ҡайтҡан ғына сағы, дуҫтары менән “һуғып”, батырайып алғас, клуб артында бер егетте туҡмағайны. Шыпа “ҡыйығы китә”. Еңгәй менән сабыйҙары имен генә булһын инде! Әсәй менән атай ғына белеп ҡалмаһын был хәлде, төн, алыҫ юл тип ҡарап тормай, райондан килеп етерҙәр... Бына ишек алдары. Туҡылдатам. – Мөмкинме? Һаумыһығыҙ! – тием, эскә үткәс.             Тауыш биреүсе юҡ. Йәш ярымлыҡ ҡустым тупылдап ҡаршыма килеп сыға. – Ана! – миңә бер балдаҡ һуҙа сабый. 

“Һуҡҡан...”
“Һуҡҡан...”

– Матур, – тием, балдаҡты кире биреп. – Әсәй менән атай ҡайҙа?

– Ана, – төп яҡҡа күрһәтә бәләкәс.

– Ә, – ағайымдарҙың өйҙәрендәге сәйер тынлыҡҡа ҡолаҡ һала-һала һағайып өҫ кейемемде эләм. Тауыш-тын ишетелмәй. Иҫереп йоҡлаймы икән? Бәләкәсте күтәреп, аяҡ осонда ғына төпкә үтәбеҙ.

            Шул саҡ төпкө бүлмәнән ағайым, еңгәм килеп сыға. Икеһе лә йылмая.

– Һаумы, һеңлекәш! – тип килеп күрешә ағайым, сабый шунда уҡ атаһының ҡулына күсә.

– Һаумы, бикәс, – тип ҡосаҡлап ала еңгәм. – Әйҙә, табынға үт!

            Ҡунаҡ бүлмәһенең уртаһына мул өҫтәл әҙерләгәндәр. Дүртәүләп ултырышабыҙ. Минең башым тубалдай ҡатҡан. Бер нимә лә аңламайым. “Ағайымды, “һуҡҡан”, тигәйне бит еңгәм. Эшендә, эскәнме лә, хәҙер айығып өлгөргәнме? Әллә берәйһенә бәйләнеп һуҡҡанмы? Әллә токтан һуғылғанмы? Машинаһының тәҙрәһен асып йөрөп, ел һуҡҡанмы?..

–Шулай итеп, – тине ағайым, мине уйҙарымдан айырып, – һеңлекәш, һине үтеп киткән тыуған көнөң менән ҡотлап, һиңә өләсәйебеҙҙән ҡалған көмөш тәңкәнән балдаҡ эшләнем.

– Мә, бабаҡ! – тип эргәмә килде ҡустыҡайым.

– Ағайым балдаҡ һуҡҡан! – тип ҡысҡырып ебәрҙем мин, ҡустымды йәнә күтәреп, атаһына рәхмәт әйтергә лә онотоп. – Тимерсе ағайым тыуған көнөмә көмөш балдаҡ һуҡҡан!

Илгиз ИШБУЛАТОВ.

 

Изображение от storyset на Freepik

Автор:Илгиз Ишбулатов
Читайте нас: