+27 °С
Ясна
Бөтә яңылыҡтар
Юмореска
18 Октябрь 2022, 19:00

Мөмкинлектәр заманы (юмореска)

– Ҡустым, – тине Шәрәй кесе коллегаһы Гәрәйгә, – ваҡытыңды, мәлеңде, мөмкинлектәреңде файҙаланып ҡал. Хәҙер – мөмкинлектәр заманы! – Ниндәй мөмкинлектәр? – Гәрәй һағайҙы. – Бына, автобусыңда рейсҡа сығаһың бит, – тине Шәрәй, – шунда ун кешеңдең береһенең аҡсаһын кеҫәңә һалаһың. – Ә, юҡ, минән булмай. – Ни эшләп булмаһын, ти? Йә, әйт әле, һин эшләйһеңме?

Мөмкинлектәр заманы (юмореска)
Мөмкинлектәр заманы (юмореска)

– Эшләйем.

– Эшләгәс, аҡсаһын да алырға тейешһең. “Ҡырын” аҡсаһын да, тураһын да, тигәндәй...

– Юҡ, ағай. Мин – ҡурҡаҡ ул. Йә, тикшереп ҡуйһалар, тотолһам тағын...

– Әй, әттәгенәһе! Исмаһам, солярка “елгәрәһеңме”?

– Юҡ.

– Һуң, өс балаңдың тамағын нисек туйҙыраһың?

– Ҡәҙимгесә: күп тә бөтә, әҙ ҙә етә, тием.

– Нисек инде?

– Кредит алмайым, юрғаныма ҡарап аяҡ һуҙам.

– Әй, ҡустым, бөтөнләй эшләй ҙә, йәшәй ҙә белмәйһең икән! Һинеңсә йәшәһәң, бөтөнләй аяҡ һуҙырға була. Мин һиңә, “командировканан” ҡайтҡас, бер серҙе асырмын әле.

– Ярай. Ә командировкаң оҙаҡҡамы?

– Юҡ, ике йылға тиклем генә. Бәлки иртәрәк тә сығарырҙар. Хәҙер, үҙең беләһең бит, мөмкинлектәр заманы.

Фото: <a href="https://ru.freepik.com/free-vector/_14565642.htm#query=%D0%B0%D0%B2%D1%82%D0%BE%D0%B1%D1%83%D1%81&position=1&from_view=search&track=sph">Изображение от storyset</a> на Freepik

Автор:Илгиз Ишбулатов
Читайте нас: