Кескәйҙәр көлә

Фәдис (биш йәш) ишектән кергән атаһына ҡаршы йүгерә:
– Тиҙерәк телевизор ҡара: эшләмәй генә бик байыҡҡан ағайҙы күрһә­тәләр! – ти ҙә өҫтәп ҡуя: – Ә һин: “Ты­рышып эшләгәндәр генә байыға”, – тиһең. Алдайһың бит, атай!

***
Фәдис балалар баҡсаһында тәр­биә­сегә һорау бирә:
– Был күлдәгеңде икенсе көн кейеп килдең, бүтәне юҡмы ни?

***
Фәдистең әсәһе:
– Хәҙер Фәриҙә апайың имтихан тапшырып ҡайта, – ти.
– Имтиханды ниңә тапшыра? – Фәдис ғәжәпләнә.
– Белемле булырға. Уҡыған кешенең теле икәү була, – тип аңлата әсәһе.
Фәриҙә имтиханын һәйбәт тапшыр­ған икән – өлкәндәр уны ихлас ҡот­лай. Фәдис апаһы янына килә лә:
– Хәҙер икенсе телеңде күрһәт! – ти.

Нажиә ИГЕҘЙӘНОВА.