Тәртип юлдан башлана. Милли проекттар яңы бурыстар ҡуя.

Кисә Кремлдә Рәсәй Федерацияһында автомобиль юлдары селтәрен үҫтереү һәм юл хәрәкәте именлеген тәьмин итеү мәсьәләләре буйынса Дәүләт Советы ултырышы үтте. Ултырышты РФ Президенты В.В. Путин алып барҙы һәм инеш һүҙ менән сығыш яһаны. Дәүләт башлығы билдәләүенсә, һуңғы йылдарҙа федераль кимәлдәге юлдарҙы техник талаптарға тап килтереү буынса ҙур эш башҡарылған. Мәҫәлән, 2010 йылда федераль трассаларҙың 38 проценты самаһы ғына стандарттарға яуап биргән, һуңғы дүрт йылда 2423 км. юл төҙөлгән һәм техник талаптарға яуап биргән юлдар күләме 83 процентҡа еткән. Юлдарҙың видео-камералар урынлаштырылған өлөшө йылдан-йыл арта бара. Тик Президент күҙәтеү сараларының йәшереп ҡуйылыуы менән ҡәнәғәт түгел. Камералар күренеп торорға һәм водителдәрҙе тәртипкә өйрәтергә бурыслы.