Сүриәләге татыулыҡ яҙмышы Рәсәй менән Төркиә ҡулында. АҠШ нефть ятҡылыҡтарын һаҡлауға өҫтөнлөк бирә.

Үткән аҙнала Рәсәй Президенты Владимир Путин Төркиә башлығы Рәжәп Эрдоған менән телефон аша оҙаҡ ҡына һөйләште. Ике ил лидеры үҙ-ара иҡтисади бәйләнештәр, берлектәге проекттар, киләсәктә аралашыуҙар календары буйынса фекер алышты. Ике ил етәкселәре хәрби-техник хеҙмәттәшлек мәсьәләләрен дә ҡараған. НАТО-ның һәм АҠШ-тың ҡаршылығына ҡарамаҫтан, Төркиә Рәсәйҙән С-400 зенит-ракета комплекстарын һатып алды һәм оҙаҡламай улар хәрби бурыстарын үтәй башлаясаҡ. Төркиәнең Рәсәйҙән хәрби самолеттар һатып алыуы ла бик ихтимал.