Осрашҡан һайын үбешеү һәм күрешеү мотлаҡ түгел.

Һәр ҡурҡыныс хәбәргә ышанмағыҙ. Иң мөһиме тыныс ҡалырға һәм ҡағиҙәләрҙе үтәргә.

Донъя ауыр һәм етди һынауҙар алдында торғаны барыбыҙға ла мәғлүм. Үкенескә ҡаршы, мәғлүмәт юҡлығынан һәм интернет мөмкинлектәренән файҙаланып популярлыҡ ҡаҙанырға, лайктар йыйырға теләүселәр табылып тора.

Әле Италиянан килгән береһенән-береһе ҡурҡынысыраҡ хәбәрҙәр тарала. Үкенескә ҡаршы, был ил үлемесле сир алдында көсһөҙ булып сыҡты. Ике-өс аҙна элек кенә сағыштырмаса тыныс һәм күңелле илдә бөгөн үлеүселәр һаны Ҡытайға ҡарағанда күберәк. Был илдә йәшәп ҡайтыусылар шуны билдәләй, уларҙың аралашыу мөхите һәм йолалары сирҙе таралыуға булышлыҡ итә. Хис-тойғоло итальяндар өсөн әйләнгән һайын ҡосаҡлашыу, үбешеү ғәҙәти күренеш икән. Иғтибар итеүегеҙсә, сәләмләүҙең был төрө беҙҙә лә таралыу таба башланы. Әйҙәгеҙ, тыйнаҡ булайыҡ, беҙҙең ата-бабаларыбыҙ бер күрешеүҙе һәм күҙгә ҡарап баш эйеүҙе оло хөрмәткә тиңләгән.

Иҫән-һау булығыҙ!