Владимир Путин: ”Сирҙең таралыуын туҡтатыу ғәҙәттән тыш саралар талап итә”.

Евразия иҡтисади советының ултырышы кисә видеоконференция форматында үтте һәм мөһим мәсьәләләрҙе тикшереүгә арналды. Иң тәүҙә ултырышта иҡтисад мәсьәләләр тикшерелер, тип көтөлһә лә, Евразия илдәрендә йоғошло сирҙең таралыуы һәм уның менән көрәш төп темаға әйләнде.

Рәсәй Президенты Владимир Путин, вирустың таралыуын туҡтатыу өсөн ғәҙәттән тыш саралар күрергә кәрәк, тип билдәләне. Был ойошмаға ҡараған илдәрҙә сиргә ҡаршы көрәш үҙ-ара сауҙа итеү менән генә түгел, эшсе көстәр менән алышыу, көйләнмәгән һәм законһыҙ миграция һымаҡ күренештәр менән ҡатмарлаша. Кәңәшмәлә Рәсәй Президенты билдәләүенсә, Хөкүмәт сирҙең таралыуын туҡтатыу өсөн бөтәһен дә эшләй, ләкин сирләүселәр һаны артыуын дауам итә. Рәсәйҙең 51 төбәгендә һуңғы тәүлектә 2774 сирле теркәлгән. Сирләүселәр һаны 21 меңдән артып киткән. 1700 кеше һауыҡҡан, 170 – үлгән.

Килеп тыуған шарттарҙа йоғошло сирҙең үтеп инеүен күмәк көс менән генә еңергә мөмкин, тип билдәләне Владимир Путин.

Кәңәшмәлә Евразия союзына ҡараған илдәр вәкилдәре һаулыҡ һаҡлау йүнәлешендәге ҡорамалдар менән пошлинаһыҙ сауҙа итеү, тәжрибә уртаҡлашыу, дарыуҙар менән тәьмин итеү мәсьәләләрен ҡараны.