Бөрйәндә Аҡбуҙатҡа һәйкәл асылды. Һәйкәлде асыу тантанаһында CIOFF президенты Филипп Боссан, Башҡортостандың мәҙәниәт министры Әминә Шафиҡова, Фольклориадала ҡатнашыусылар һәм башҡа ҡунаҡтар булды.
«Аҡбуҙат» композицияһы Кәҫле заводында суйындан ҡойолған, уның авторы – скульптор Өлфәт Ҡобағошов. Ижадсы был һәйкәл тураһында 1977 йылдан бирле хыялланған. Әле уның тағы бер хыялы бар – Өфөлә Урал батырға һөйкәл ҡуйыу.
Башҡортостандың халыҡ шағиры Рәшит Шәкүр һәйкәл асыу тантанаһында Аҡбуҙат скульптураһының әһәмиәте, был образда башҡорт халҡының боронғо тарихы, уның рухы сағылыуы тураһында һөйләне.
Башҡорт халыҡ ауыҙ-тел ижадының әһәмиәтле образдарының береһе булғанға был һөйкәлде асыу ваҡиғаһы халыҡ-ара Фольклориада программаһы өсөн бик йәтеш һәм ҡулай булды.
Фото: Юлай Кәримов.