КӨЛӘ-КӨЛӘ ҺЕҘГӘ КИЛӘБЕҘ – ҠАРАНЙЫЛҒА АУЫЛЫНА!

Йыр-моңға, “Һәнәк”сә сатира-юморлы монологтарға, көләмәстәргә, йор һүҙгә һәм алҡыштарға бай булды осрашыу. Рифат Йәмлихин менән Харис Шәрипов бер үҙҙәре тотто публиканы. Уларҙы халыҡ сәхнәнән оҙаҡ ебәрмәй торҙо. Иң даланлы, өлөшлө өлгөрҙәр, журналға яҙылып, бүләккә Артур Василовтан шарж эшләтеп кинәнде. Рәссам концерт буйына ҡәләмен ҡулынан төшөрмәне, тиерлек.

Тағы шуныһы һөйөндөрҙө – бәнда дәртле, рухлы йәштәр үҫеп килә икән. Улар, беҙ йыйынған арала, башҡорт йырсылары яҙмаларына һелкенеп, дискотекала бейене. Беҙ ҡуҙғалыр булғас, әллә ҡайһы арала машинабыҙ эргәһендә пәйҙә булып, беҙҙең арттан ҡул болғап оҙатып ҡалдылар, тағын килегеҙ, тип саҡырҙылар. Барырбыҙ, Алла бирһә, тинек.  

Осрашыуҙы ойоштороуға ҙур ярҙам күрһәтеүҙәре өсөн: мәҙәниәт йорто мөдире Марс Марат улы Ғәзизовҡа, китапханасы Гөлшәт Миңлеәхмәт ҡыҙы Вәлиеваға, ауыл хакимиәте башлығы Венер Сәхиулла улы Ҡунафинға, клуб хеҙмәткәре Люциә Вәхитоваға һәм беҙгә донъяға билдәле ғалим ауылдаштары – Жәлил Кейекбаев музейына ентекле экскурсия үткәреүе өсөн тарихсы Азат Ишмырҙинға оло рәхмәтебеҙҙе еткерәбеҙ!

Беҙҙе республикабыҙҙың төрлө ауыл-ҡалаларында көтөгөҙ! Көлә-көлә һеҙгә килебеҙ!

Һүрәттәрҙә: байрамдан күренештәр, Артур Василовтың ҡайһы бер шарждары.