Китек

Китек

Берәү берәүҙе ҡайғыртмай –
Тормоштоң ғәләмәте.
Төркөмдә яңғыҙ һәр бере,
Ғаиләлә – һәр кем йәтим...
Берәү берәүҙе уйламай –
Һәр кемдең үҙ юҫығы.
«Ҡайҙа барабыҙ, кешеләр!» –
Тиеп килә ҡысҡырғым.
Берәү берәүҙе һанламай –
Һәр кемдең үҙ мәйеле.
Кешелек алға киткәндә
Аҙа кеше бәйеле.
Берәү берәүгә кәрәкмәй –
Шундай заманға еттек.
Донъяларыбыҙ бөтөн дә,
Күңелгенәбеҙ китек...

Ғүмер

Һүтә икән – үтә икән
Йүгерек елдәй.
Маңлайҙағы бураҙналар –
Ул һалған билдә.
Уҙа икән, туҙа икән
Төҙөк тәнең дә.
Ғәмдәр һала, сәмдәр һала
Яйлап йәнеңә.
Кире ҡайтмай, юлын бормай,
Үҙгәртмәй йырҙа.
Тәҡдиргә нисек яҙылған –
Ул шулай уҙа...

Сәбәп

Эш юҡ, тигән ике һүҙ –
Йөрәк үртәр ике ҡуҙ.
Наһыр² телер бысаҡтыр,
Кемгә – сәбәп, ошаҡтыр.
Эш юҡ, тигән заманда
Эш эшләүсе кеше юҡ.
Эсеүсеһе – миллион –
Берәүҙең бер эше юҡ.
Эш юҡ, тигән лозунг(ы)
Илдең билен күтәрмәй,
Хәйерселеккә тарта,
Байманлыҡҡа этәрмәй.
Эш юҡ, тип бер бушамай
Йыйылыш-ултырыштан
Ҡатыу алды арҡаны,
Шеш сыҡты ултырышҡа.
Эш юҡ, тигән ике һүҙ
Тормош бәҫен ебәрҙе.
Ялҡау итте бисәне,
Мәмәй итте ирҙәрҙе.
Эш юҡ, тигән ике һүҙ
Эшләмәҫкә сәбәптер.
Тәүәкәлләп Хоҙайға,
Эш башларға сәғәттер!

Әсирлек...

Шундай заманда йәшәйбеҙ –
Ваҡыт ағышы яман.
Бер мин түгел ул, аҙашып,
Таш быуаттарҙа ҡалған...
Сәбәләнеп, үрһәләнеп,
Тапап, йығып бөтәһен –
Өлгөрмәйсә абынаһың –
Шулай донъя көтәһең.
Шундай осорҙа йәшәйбеҙ –
Тотоп булмай мәлдәрҙе.
Донъя ҡыуып, эш-көш, тиеп,
Бөтә инде хәлдәрең...
Шундай мәлдәрҙә йәшәйбеҙ –
Ваҡыт ағышы йота.
Бәрәкәтенән яҙған да,
Беҙҙе әсирҙә тота...

Тибендәге аттар

Тибендәге аттар – ялан йәме,
Үҙ йүндәрен күрә, серәшеп.
Рухыбыҙҙың әллә сағылышы,
Әллә башҡортлоҡтоң көрәше...
Тибендәге аттар һаҡ-уяуҙар –
Өйөрөнә яттар инәлмәй.
Ҡырағайлыҡ – һаҡлар
ҡалҡандары,
Теләгәне тотоп менәлмәй.
Тибендәге аттар – йылҡы йәме,
Тыуған ерҙең аҫыл заттары.
Буйһонмаған холоҡ, ирек көҫәү
Хайуандарҙа ҡалған саҡ бары.
Тибендәге аттар – аҡ киңлекте
Сыбар ғына иткән тап икән.
Кешелектең кешелеге бөтһә,
Малҡайҙарҙан аҡыл тап икән...

Фото: onli-vk.ru