Ял

Фатирҙа үле тынлыҡ урынлашты. Рузалин һәм Сәм­сүрә өсөн иң ауыр һорау­ҙарҙың береһе ине был. Йыл һа­йын улар шулай икеһе бер ваҡыт­та ялға сыға ла ҡайҙа ба­рырға тип баш вата. Сит илгәме, әллә үҙебеҙ­ҙәге ял йортонамы, әллә шифа­ха­наға барырғамы, тип, улар оҙаҡ бәхәсләшә. Һайлау бик ауыр эш – айырыуса аҡсаң таҡы-тоҡо булһа.
– Берәй нәмә уйлап табырбыҙ әле... – тигән булды Рузалин ҡа­тынын тынысландырырға теләп.
Киске аш ваҡытында ҡатыны ошо мәсьәләне тағы ҡуҙғатты.
– Кешеләр кеүек Төркиәгә барып, диңгеҙҙә һыу ҡойоноп, ҡыҙынып ҡайтһаң икән ул, – тине Сәмсүрә. – Әллә быйыл тәүәк­кәл­ләйбеҙме?..
– Ғүмергә бер барғанда шәп булыр ине, ҡарсыҡ, – тине Рузалин. – Тик аҡ­са самалы бит. Ял итеүен итер­һең, унан һуң да йә­шәйһе бар бит әле. Ҡай­ҙан аҡса табырбыҙ? Тағы бурысҡа батҡы килмәй. Кредит тү­ләй-түләй арып бөттөк... Бәл­ки Ҡара диң­геҙ буйына – Адлерға йәки Анапаға ғына ба­рырбыҙ?
– Унда самолетта барам тиһәң, билеты бик ҡиммәт. Етмәһә, көн һа­йын самолет шартлауы тура­һында һөй­ләйҙәр, белә тороп үлгем килмәй әле. Поезда бар­һаң, ике тәүлек ҡыҙыу мунса кеүек тынсыу вагонда ҡыҙы­нырға кәрәк, – тип ҡаты­ны ҡаршы төштө.
– Улайһа үҙебеҙҙәге бе­рәй шифаханаға бара­йыҡ... Туҡта, шифахана тураһында бер мәҙәк һөй­ләйем әле. Бер ағай ял йортона килгәс: «Бында нисек ашаталар?» – тип ял итеүсенән ҡыҙыҡһына икән. «Бер телем икмәк бир­һәң, әйтәм», – тип яуап бир­гән тегеһе.
– Тоҙһоҙ мәҙәктәреңде һөйләп торма әле. Унда хәҙер яҡшы ашаталар. Август айында, бөтә халыҡ отпускта ваҡытта, урын табып ҡара! Ғинуар айында уҡ әйттем мин һиңә, алдан ҡайғырт, тип. Белешеп ҡуйған булһаң, рәхәт­лә­неп шифаханала ял итер инек...
– Туҡта әле, ҡарсыҡ, үҙебеҙҙең Өфөлә лә Ағиҙел буйында, йәки Сипайловоның Ҡашҡаҙан күле буйында кеше рәхәтләнеп ял итә бит, һыу ҡойона, – тине Рузалин, һыуға батҡанда һаламға тотонорға теләгәндәй. – Йыраҡ бараһы түгел, аҡса ла янда ҡала. Ашарға ҡыяр-помидор һәм һыра алаһың да вәссәләм...
– Һинең шул булыр инде. Бар уйың һыра һемереүҙә, – тине ҡатыны кәйефе төшөп. – Ул йыл­ға-күл буйындағы шешә һәм бысраҡты күргәнең бар бит инде. Шунда ба­райыҡ тип тораһың, ет­мәһә. Ундағы иҫеректәр араһына барып ятаһым юҡ!
Ҡыҙыу бәхәс ошо урында туҡ­тап ҡалды. Икеһе лә өндәш­мәйенсә бер аҙ уйланып ултыр­ҙы, улар эстән генә һуңғы йыл­дарҙағыса ял итергә ҡарар итте.
– Дүшәмбе мине балалар менән ауылға ҡайтарып ҡуйыр­һың. Әсәй эргәһендә бер-ике аҙна торормон, бәрәңгене лә утап-күмәһе бар, – тине Сәмсүрә.
Рузалин таушалған-иҙелгән диванына барып ятты, изолента менән уралып бөткән пультты алып телевизор ҡабыҙҙы.

Фәнүз ХӘБИБУЛЛИН.